Germaniya hukumati 2016-yilda mahalliy rasmiylarga qochoqlar bilan bog‘liq xarajatlar uchun 9,3 milliard yevro ajratdi. Bu haqda 24-may, chorshanba kuni hukumat muhokamasiga kiritiladigan hisobotga tayanib, Rheinische Post ma’lum qildi, deya xabar beradi “Korrespondent.net”.
Bu mablag‘dan 5,5 milliardi qochoq maqomini berish to‘g‘risidagi talabnomalari ko‘rib chiqish jarayonida bo‘lgan muhojirlarni qo‘llab-quvvatlashga yo‘naltirildi.
Yana 2 milliard yevro integratsiya bo‘yicha tadbirlar, 400 million yevro yotoqxonalarni qurish va jihozlash, 350 million yevro voyaga yetmagan va Germaniya hududiga ota-onalarisiz kelgan muhojirlarga yordam ko‘rsatishga berildi.
Shuningdek, Germaniya hukumati kishilarning o‘z mamlakatlaridan qochish sabablariga barham berish yoki hech bo‘lmaganda, qisqartirishga imkon yaratadigan tadbirlarga 11 milliard yevrodan ortiq mablag‘ ajratdi.