Mavzuga doir: Foto: Portlashdan keyingi Manchester
Portlash haqidagi axborot mahalliy vaqt bilan soat 22:35 da (Toshkent vaqti bilan 02:35 da) kelib tushdi. Guvohlarning so‘zlariga ko‘ra, portlash (yoki ikkita portlash) ovozi konsert tugashi bilan yangragan. Manchester Arena’da olingan ko‘plab videoyozuvlarda odamlar vahimada zalni tark etishga urinayotgani aks etgan.
Kamida 22 kishi halok bo‘lgan, 59 kishi jabrlangan. Politsiya qurbonlar haqidagi rasmiy axborotni hodisa yuz berganidan ikki yarim soat o‘tib e’lon qildi. Bungacha AQShning NBC News telekanali manbalarga asoslanib kamida 20 kishi halok bo‘lgani va “yuzlab odamlar” jarohatlangani haqida xabar bergan edi; guvohlar yerda cho‘zilib yotgan 20 nafardan 30 nafargacha odamni ko‘rganini aytgan. Konsertda jami qancha odam bo‘lgani hozircha aytilmayapti; Manchester Arena o‘z bag‘riga 21 ming tomoshabinni sig‘dira oladigan Yevropadagi eng katta yopiq stadionlardan biridir.
Portlash zalning o‘zida bo‘lmagan. Transport politsiyasining ma’lum qilishicha, portlash stadion foyesida yuz bergan, Manchester Arena ma’muriyati esa hodisa “inshootdan tashqarida, jamoat makonida” yuz berganini ta’kidlamoqda. Portlash sabab shaharning asosiy temiryo‘l stansiyalaridan biri, arena yonidagi Manchester Victoria bekati yopilgan.
Tergov hodisani terakt sifatida ko‘rib chiqmoqda. Politsiya vakillarining ma’lum qilishicha, rad etuvchi boshqa dalillarni topa olishmasa, aynan terakt versiyasi ustuvor bo‘lib qoladi. NBC News va Reuters’ning manbalari esa terrorchi-xudkush bilan bog‘liq versiya o‘rganib chiqilayotganini bildirgan. ABC News manbasining ma’lum qilishicha, portlovchi uskuna mixlar bilan to‘ldirilgan bo‘lgan.
Konsertda ko‘plab bolalar va o‘smirlar bo‘lgan – xonandalik va aktrisalik faoliyatini bolaligidayoq boshlagan 23 yoshli Ariana Grande asosan yoshlar orasida mashhur. Portlashdan so‘ng ijtimoiy tarmoqlarda ota-onasi bilan konsertga kelgan bolalarning yo‘qolib qolgani haqida xabarlar paydo bo‘lgan. Xonandaning o‘zi esa, uning vakillari bergan ma’lumotga ko‘ra, portlash oqibatida jabrlanmagan.
Izoh (0)