Joshuadan mag‘lub bo‘lganiga qaramay, kichik Klichko reytingda Tayson hamda Lyuisdan o‘zib ketdi

Ukrainalik mashhur bokschi Vladimir Klichko boks tarixidagi eng kuchli 10 nafar charm qo‘lqop ustalari safiga kiritildi, deb xabar berdi “Olamsport”.

Bu bilan u afsonaviy bokschilar — Mayk Tayson va Lennoks Lyuisni ortda qoldirishga muvaffaq bo‘ldi. Chunki kichik Klichko 9,5 yil davomida jahon chempionligi unvonini o‘zida saqlab kelgan.

Reyting tuzishda kompyuter ma’lumotlari inobatga olinmagan va Vladimir Klichko uning 6-pog‘onasiga joylashtirilgan. Ukrainalik bokschi shu tariqa Jorj Forman, Jo Freyzer, Mayk Tayson, Lennoks Lyuis va Rokki Marchiano kabi hamkasblarini ortda qoldirdi.

Muhammad Ali, Jo Luis, Sem Lengford, Evander Xolifild, Gerri Uilss kabi charm qo‘lqop ustalari Klichkodan oldinroq o‘rinlarni band etgan. Bunda Uilss va Lengfordning XX asr boshlaridagi janglari ham inobatga olingan. Uills professional boksda 83, Lengford esa 248 ta jang o‘tkazgan.