“O‘zbekiston havo yo‘llari” milliy aviakompaniyasi 18-may, payshanba kuni Toshkent—Riga—Nyu-York—Toshkent yo‘nalishida Boeing 787 Dreamliner samolyotida ilk parvozni amalga oshiradi. Bu haqda aviakompaniya matbuot xizmati xabar bermoqda.
Boeing 787 samolyotlarining mazkur yo‘nalishda ekspluatatsiya qilinishi yo‘lovchilarga Rigaga 20-30 daqiqa, Nyu-Yorkka esa bir soat oldin yetib borish imkonini beradi.
246 ta (bundan 24 ta “biznes” va 222 ta “ekonom” klass) o‘rindiqqa mo‘ljallangan Dreamliner saloni dizayniga yangicha yondashuv yo‘lovchilariga uzoq parvoz davomida barcha sharoitlarni yaratadi. Qulay va keng o‘rindiqlar, har bir yo‘lovchi uchun alohida monitorlar, havoni namlantiruvchi maxsus uskuna, yangi sahn qoplamalari, yoritish va shovqin o‘tkazmaydigan tizimlar yo‘lovchilarning parvozlarini maroqli o‘tkazishiga imkon beradi.
Eslatib o‘tamiz, “O‘zbekiston havo yo‘llari” Boeing 787 Dreamliner samolyotlarining tijoriy ekspluatatsiyasini o‘tgan yilning sentabr oyidan boshlagandi. Bugungi kunda ular orqali Dubay, Istambul, Tel-Aviv, Seul, Frankfurt, Moskva, Kuala-Lumpur va Singapur shaharlariga qatnovlar muvaffaqiyatli amalga oshirilmoqda.
Shu yil 27-iyulida esa milliy aviatashuvchi ilk bor “orzu laynerida” Toshkentdan Nyu-Yorkka to‘g‘ridan-to‘g‘ri uzluksiz parvozni bajaradi. Shuningdek, milliy aviakompaniya Riga orqali AQShga haftasiga bir martalik qatnovlarni saqlab qoladi.
Izoh (0)