Tojikistonda 30-may kuni “Dushanbe — Aksilterror 2017” xalqaro o‘quv mashg‘ulotlarining faol bosqichi boshlanadi. Unda ishtirok etish uchun respublikaga rossiyalik harbiylar va aviatsiyaning qo‘shimcha kontingenti tashlanadi. Bu haqda Markaziy harbiy okrug qo‘shinlari qo‘mondoni yordamchisi polkovnik Yaroslav Roshchupkin ma’lum qildi, deb yozadi “TASS”.
“Rossiya harbiy kontingenti ‘Dushanbe — Aksilterror” xalqaro o‘quv mashg‘ulotlarida ishtirok etadi. Mashg‘ulotlar doirasidagi amaliy harakatlar 30-may kuni Tojikiston Respublikasida boshlanadi. Mashg‘ulotlar davomida quruqlikdagi qo‘shinlarning qo‘shma guruhi aviatsiya ko‘magida terrorchilik guruhlariga qarshi kurashish, tog‘li hududlardagi qurollangan noqonuniy tuzilmalarga qarshi kurashish, shuningdek, tinchlik o‘rnatishga qaratilgan operatsiya elementlarini ishlab chiqadi”, — dedi Roshchupkin.
Uning so‘zlariga qaraganda, mashg‘ulotlar vazifalarini bajarish uchun Tojikistondagi Rossiya 201-harbiy bazasi imkoniyatlari oshiriladi.