Fotogalereya: Qayta tug‘ilgan 10 ta avtomobil

Yirik avtomobil ishlab chiqaruvchilar yillar o‘tib ba’zi eski avtomobillarga qayta hayot berib, ularni yangilangan ko‘rinishda ishlab chiqaradi. “Motor” nashri ana shunday qaytadan ishlab chiqarilgan avtomobillar jamlanmasini taqdim etdi.

BMW 8 Series

Mashina ro‘yxatdagi yagona qayta tug‘ilmagan avtomobil hisoblanadi. E31 indeksiga ega bo‘lgan model 1989-yildan 1999-yilgacha ishlab chiqarilgan. Jami ishlab chiqarilgan avtomobillar soni 31 mingtadan oshgan. Avtomobil modifikatsiyasiga qarab, unga V8 va V12 dvigatellar o‘rnatilgan. Eng yaxshi pozitsiya bo‘lgan 850CSi 5,6 litr sig‘imli 12 silindrli 380 ot kuchiga ega dvigatel bilan jihozlangan.

Yangilangan talqin may oyining oxirida Concorso dʼEleganza Villa dʼEste konkursida namoyish etiladi. Avtomobilning seriyali ko‘rinishi 2018-yilda paydo bo‘ladi. Yangilangan M8 talqini 600 ot kuchiga ega V8 tvin-turbo dvigateli bilan jihozlanishi kutilmoqda.

Mitsubishi Eclipse

Yapon avto ishlab chiqaruvchisi tomonidan 1989—2011-yillarda ishlab chiqarilgan sportkarning so‘nggi avlodi 3,8 litr sig‘imli 266 ot kuchiga ega V6 dvigateli bilan jihozlangan.

2017-yilning fevral oyida Mitsubishi Motors yangi Eclipse’ni namoyish etdi. Avtomobil nomiga Cross qo‘shilgan. Yangi Eclipse Cross yarim litr sig‘imli benzin turbomotoriga, shuningdek, 2,2 dizel motoriga ega.

Lincoln Continental

Lincoln Continental amerikalik ishlab chiqaruvchining konveyeridan uch marta chiqib ketgan: 1948-yil, 1980-yil va 2002-yil. 2015-yilda kompaniya avtomobilning yangi ko‘rinishini taqdim etdi. 2016-yilda Detroytda bo‘lib o‘tgan motorshouda Lincoln qayta tug‘ilgan avtomobilning seriyali ko‘rinishini taqdim etdi.

Yangi Continental’ning saloni haqiqiy charm, yog‘och va alyuminiydan ishlangan. Shu bilan birga sedanda an’anaviy eshik ochgichlar yo‘q. ular kuzovda emas, oynaning pastki qismida joylashgan. Avtomobil uch litr sig‘imli 405 ot kuchiga ega tvin-turbo dvigateliga ega.

Ford GT

Birinchi GT40 1969-yilda 105 nusxada ishlab chiqarilgan. 2004-yilda yangi GT ishlab chiqarilgan. 2006-yilgacha amerikalik avtoishlab chiqaruvchi to‘rt mingdan ortiq GT ishlab chiqardi, shundan so‘ng avtomobil konveyerdan chiqib ketdi.

Yangi GT 655 ot kuchiga ega, eng yuqori tezligi 347 km/soat. 2016-yilda GT ning poygachi GTE talqini 24 soatli Le Man poygasida g‘olib chiqdi.

Nissan Terrano

Yo‘ltanlamas 1993-yildan 2006-yilgacha ishlab chiqarilgan. 2013-yilda yangi Nissan Terrano taqdim etilgan. Uni avvalgi talqin bilan faqat nomi bog‘lab turadi, chunki yangi talqin Renault Duster’ning nusxasi hisoblanadi.

Citroen C6

2005-yilda taqdim etilgan Citroen C6 sedani shunchalik shinam va noodatiy bo‘lganki, undan birdaniga Fransiyaning ikki prezidenti Jak Shirak va Nikolya Sarkozi foydalangan. 2012-yilda avtomobilning ishlab chiqarilishi to‘xtatilgan.

Yangi avlod Citroen C6 2016-yilda paydo bo‘ldi. Avtomobil faqat xitoy bozori uchun mo‘ljallanganligi sababli u Pekin avtosalonida namoyish etilgan.

Fiat 124 Spider

124 oilasi o‘z ichiga kupe va kabriolet kirgan. Birinchi avtomobil 1967-yildan 1975-yilgacha ishlab chiqarilgan. Ikkinchisi esa 1966—1985-yillarda ishlab chiqarilgan.

2015-yilning may oyida Fiat 124 Spider yana qatorga qaytdi. Yangi avtomobil so‘nggi avlod Mazda MX-5 asosida yaratildi. Avtomobil 1,4 litr sig‘imli 160 ot kuchiga ega dvigatel bilan jihozlangan.

Acura NSX

Kupe 1990-yilda taqdim etilgan va 2005-yilgacha ishlab chiqarilgan. U ko‘p miqdorda ishlab chiqarilgan birinchi alyuminiy kuzovli avtomobil hisoblanadi.

Yangi NSX uch yildan so‘ng taqdim etildi. Uning uchta eletrodvigatelli agregati asosida 3,5 litr sig‘imli 500 ot kuchiga ega benzin motori turadi. Elektrodvigatellarning bittasi tezlik olishga xizmat qiladi, qolgan ikkitasi esa old o‘q g‘ildiraklarini aylantiradi.

Alfa Romeo Giulia

Avtomobil 1962-yildan 1978-yilgacha ishlab chiqarilgan. 2015-yilda yangi avlod Giulia taqdim etildi. Yangi talqin 510 ot kuchiga ega turbomotor bilan jihozlangan.

UAZ Hunter

UAZ Hunter 1972-yildan buyon deyarli o‘zgarishlarsiz yashab keldi. U shunchaki UAZ 469 bo‘lgan. 2014-yilda Hunter ma’naviy va jismoniy jihatdan eskirgan hisoblanib, 2015-yilda ishlab chiqarishdan olib tashlandi.

2016-yilda mijozlar talabini hisobga olgan holda, Hunter yana ishlab chiqarishga qaytarildi.