Toshkentda amaldorlarning noqonuniy inshootlari buzila boshlandi

5-may kuni Toshkent shahri hokimi Rahmonbek Usmonov selektor yig‘ilishi o‘tkazib, tuman hokimlari, shuningdek, tegishli sektorlar, idoralar rahbarlari va mahalla oqsoqollari bilan joriy ishlarni muhokama qildi. Bu haqda UzNews xabar bermoqda.

Yig‘ilish chog‘ida may oyining birinchi haftasida 25 aniq pozitsiya bo‘yicha amalga oshirilgan ishlar natijalari ko‘rib chiqildi. Ushbu pozitsiyalar orasida ta’mirdan chiqarilgan obyektlarning umumiy miqdori, podyezd oldi o‘tishlarining ta’miri, ko‘p qavatli uylarda liftlarning ta’miri va ularga texnik xizmat ko‘rsatish, turar-joylarning yon tomonlaridagi ta’mir ishlari, yer osti kommunikatsiyalari va inshootlari ta’miri, bolalar maydonchalarini obodonlashtirish, noqonuniy inshootlarning buzilishi bor edi.

Shahar hokimi deyarli barcha parametrlar bo‘yicha eng past ko‘rsatkich Yashnobod tumanida kuzatilayotganini ta’kidlab o‘tdi.

Yig‘ilish chog‘ida, shuningdek, shahar rahbari 4-may kuni bosh vazir A. N. Aripov bilan birga Yunusobod tumanida bo‘lganini eslatib o‘tdi. O‘shanda hukumat a’zolari tuman hududidagi bir qancha noqonuniy inshootlarni ko‘zdan kechirdi. Noqonuniy inshootlar egalari ayrim idoralarning mansabdor shaxslari va rahbarlari bo‘lib chiqdi.

Hokim, noqonuniy inshootlar egasining mansabi va lavozimidan qat’iy nazar, ular darhol buzib tashlanishi yuzasidan ko‘rsatma berdi.

Bundan tashqari, 8-maydan e’tiboran haftasiga ikki marta — seshanba va juma kunlari selektor yig‘ilishlari o‘tkazilishi belgilandi.

Hokim tumanlarning to‘rt sektor rahbarlariga 25 yo‘nalish bo‘yicha ish jarayonini ta’minlash yuzasidan qat’iy ko‘rsatmalar berdi.