Profilaktika kunida Toshkent shahrining Sergeli tumanidagi mahallalardagi muammolar muhokama qilindi, deb xabar bermoqda O‘zA.
Xususan, o‘zaro chiqisha olmay qolgan qo‘shni yigit va qiz o‘rtasidagi mojaro yoqa yirtishgacha borib yetgan. Qiz “yuqori tashkilotlarda tanishim bor, senga ko‘rsatib qo‘yaman”, deb yigitning ustidan ichki ishlar organiga ariza topshirgan.
Voqea joyiga yetib kelgan mahalla raisi ikki yoshga nasihat qilib, ularni yarashtirishga uringan. “Ammo qiz mahalla raisini ham mensimagan”, — deb yozadi O‘zA.
Sud jarayonida qiz yigitni ayblab, “Kiyimimni ham yirtgan”, deb ko‘rsatma berdi. Yigit bunday qilmaganini, lekin qiz uni haqoratlaganini, shunda ham da’vosi yo‘qligini bildirdi.
Guvoh sifatida “Nurhayot” mahalla fuqarolar yig‘ini raisi Muazzam Xolboboyevaga so‘z berilganda, u shu kuni aslida yigitning bo‘yni va qo‘llari tirnalib-shilingani, qiz uni hammaning ko‘z o‘ngida haqoratlab, hech kimga quloq solmaganini ma’lum qildi.
Janjalga aralashgan yigit eng kam ish haqining bir baravari miqdorida jarimaga tortilgan bo‘lsa, “noxolis arizachi, odob-axloq qoidalarini mensimagan” qizga eng kam ish haqining ikki baravari miqdorida jarima solindi.