Muhammad al-Xorazmiy nomidagi Toshkent axborot texnologiyalari universitetining to‘rtinchi kurs talabasi Feruz Muyassarov “IT sayyorasi — 2016/17” X xalqaro olimpiadaning final bosqichiga yo‘llanma oldi, deb xabar bermoqda O‘zA.
AT Consulting, 1S, Cisco, Huawei, Inter Systems, Oracle kabi yirik xalqaro kompaniyalar tanlov tashkilotchilari va homiylaridir.
Joriy yilda “IT sayyorasi — 2016/17” X xalqaro olimpiadaning saralash bosqichida 12 mamlakatdan 17 mingdan ziyod talaba va IT mutaxassisi ishtirok etdi. Ballar hisoblangach, ularning 1,5 mingdan ortig‘i ikkinchi bosqichga o‘tdi. Tanlovning 15 nominatsiyasidan birida g‘olib chiqishga da’vogarlik qilayotgan 370 ishtirokchi orasida Toshkent axborot texnologiyalari universitetining to‘rtinchi kurs talabasi Feruz Muyassarov ham bor.
“IT sayyorasi — 2016/17” X xalqaro olimpiadaning final bosqichi shu yil 2—5-iyun kunlari Sochi shahrida o‘tkaziladi. Final bosqich dasturida musobaqalardan tashqari yetakchi xalqaro axborot texnologiyalari kompaniyalari ishtirokida mahorat saboqlari va ma’ruzalar tinglash ham ko‘zda tutilgan.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)