Qozog‘istonlik olimlar tyulenlarning ommaviy qirg‘iniga nima sabab bo‘lganini aniqlay olishmadi
Olimlar Kaspiy dengizida tyulenlarning fojiali o‘limiga nima sabab bo‘lganini katta ehtimol bilan aniqlay olmasa kerak, deb ma’lum qildi voqea joyiga yetib kelgan mikrobiologiya va virusologiya instituti olimlari. Bu haqda KTK telekanaliga tayanib, “Kazakhstan Today” xabar qildi.
Ilmiy xodimlarga mahalliy rasmiylar tomonidan tekshirish uchun tashlab ketilgan 6 dona hayvonlar murdasi yetarli bo‘lmadi. Qolgan 240 dan ortiq o‘lik hayvonlar jasadi xavfsizlik maqsadida maxsus maydonda yoqib yuborilgan.
“Ular shunday qarorga keldi. Yaxshi, biroq bunday vaziyatlarda ikki-uchta, boring-ki beshta jasad bilan hayvonlar o‘limiga nima sabab bo‘lganini aniqlay olmaymiz, chunki ularning o‘lganiga ancha vaqt bo‘lgan”, — deydi Olmaota Mikrobiologiya va virusologiya instituti qoshidagi Ekologiya va viruslar laboratoriyasi mudiri Aydin Qadirmanov.
Halok bo‘lgan 250 tyulen — Qozog‘istondagi tyulenlar populyatsiyasining bir foizini tashkil qiladi. Nazariy jihatdan ushbu miqdordagi hayvonlar qish faslida o‘lgan va muzlar eriganidan so‘ng, bo‘ron shamollari ularni qirg‘oqqa chiqarib tashlagan bo‘lishi mumkin. Biroq olimlar hayvonlarning o‘limiga zararli zaxarlanish ham sabab bo‘lgan bo‘lishi mumkinligini istisno qilishmayapti.
25-aprel, seshanba kuni Qozog‘istonning Fort-Shevchenko hududidagi qirg‘oqni ko‘zdan kechirish chog‘ida 243 ta o‘lik tyulen aniqlangan edi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
