Joriy yilning 27-mart kuni O‘zbekiston Respublikasi Qishloq va suv xo‘jaligi vazirligida Toshket davlat agrar universiteti hamda Andijon qishloq xo‘jalik instituti Rossiyaning Janubiy Ural davlat agrar universiteti bilan hamkorlikni kengaytirish bo‘yicha bitimlarni imzolashga bag‘ishlangan tadbir bo‘lib o‘tdi. Bu haqda Axborot texnologiyalari markazi boshlig‘i “Daryo”ga ma’lum qildi.
Tadbirda O‘zbekistonning agrar sohaga ixtisoslashgan oliygohlari bilan Janubiy Ural davlat agrar universiteti o‘rtasidagi hamkorlikni yanada kengaytirish, o‘zaro bakalavr va magistrantlar almashish, zootexnika, veterinariya, agromuhandislik kabi sohalarda ilmiy-pedagog kadrlarning malaka oshirishini takomillashtirish, zamonaviy o‘quv, o‘quv-uslubiy ilmiy adabiyotlar almashinishni yo‘lga qo‘yish kabi sohalardagi aloqalarni rivojlantirishning muhim yo‘nalishlari va istiqbollari muhokama etildi.
Mehmonlar tomonidan O‘zbekistonda amalga oshirilayotgan o‘simliklarni biologik himoyalash borasidagi tajribani chuqur o‘rganish, Rossiya Federatsiyasida uni joriy qilish masalalariga katta qiziqish borligi alohida ta’kidlandi.
Oliygohlar o‘rtasidagi shartnomalar Toshkent Davlat agrar universiteti rektori B.Sulaymonov, Andijon qishloq xo‘jalik instituti rektori A.Abduvasiqov hamda Janubiy Ural davlat agrar universiteti rektori V.Litovchenko tomonidan imzolandi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)