O‘zbekistonning Londondagi elchixonasida ikki davlat o‘rtasida diplomatik munosabatlari o‘rnatilganining 25 yilligi hamda Britaniya qonunchilik organida O‘zbekiston bo‘yicha umumpartiyaviy parlament guruhi tuzilganiga bag‘ishlangan tadbir bo‘lib o‘tdi. Bu haqda “Jahon” axborot agentligi xabar bermoqda.
Tadbirda Britaniya parlamenti, tashqi ishlar, mudofaa, xalqaro savdo vazirliklari va boshqa idoralar hamda jamoatchilik, ishbilarmon va madaniy doiralarning vakillari ishtirok etdi.
Tadbir chog‘ida qayd etilganidek, ikki mamlakat xalqlari o‘rtasidagi o‘zaro aloqalar tarixi asrlarga borib taqalsa-da, O‘zbekiston Respublikasi Birinchi Prezidenti Islom Karimovning 1993-yili Londonga tashrifi chog‘ida zamonaviy munosabatlarga asos solingan edi.
Keyingi yillar davomida O‘zbekistonga Birlashgan Qirollikdan 40 dan ziyod delegatsiya keldi. O‘tgan yili ikki tomonlama mahsulot almashish hajmi 2015-yil ko‘rsatkichlariga taqqoslaganda 43 foizga oshdi. O‘zbekistonda bir necha yuzlab Britaniya kompaniyasi faoliyat ko‘rsatmoqda.
O‘zbekiston bo‘yicha umumpartiyaviy parlament guruhi raisi, Buyuk Britaniya parlamenti quyi palatasi tartibot siyosati qo‘mitasi raisi Endryu Bridjen O‘zbekistonda bo‘lgan chog‘ida mamlakat haqidagi ma’lumotlari yanada boyiganini ma’lum qildi.
Buyuk Britaniya Tashqi ishlar vazirligining Sharqiy Yevropa va Markaziy Osiyo mamlakatlari bilan hamkorlik bo‘yicha departamenti direktori Maykl Tatam bugungi kunda ikki mamlakat o‘rtasidagi munosabatlar siyosat, savdo, xavfsizlik, ta’lim va madaniyat singari ko‘pgina sohalarni qamrab olganini qayd etdi. Savdo va sanoat bo‘yicha O‘zbekiston — Britaniya kengashi, respublikada 20 yildan beri faoliyat ko‘rsatib kelayotgan Britaniya kengashi faoliyatiga yuqori baho berdi.
Izoh (0)