O‘zbekiston Prezidenti Shavkat Mirziyoyev Surxondaryo viloyatiga safari davomida 10-fevral kuni Angor tumanidagi Zang gilambob qishlog‘ida Shodi Bobo Xushboqov xonadonida mehmon bo‘lgan edi.
Uchrashuv davomida Shavkat Mirziyoyev: “Siz kabi ko‘pni ko‘rgan, yuzidan nur yog‘ilib turgan otaxon va onaxonlar jamiyatimizning mustahkam zamini, yurtimizning fayzu barakasidir”, — degan edi.
“Xonadon egalari davlatimiz rahbari xalq ichiga kirib, odamlarning fikrini o‘rganayotganidan yurtdoshlarimiz juda mamnun bo‘layotganini ta’kidladi. Odamlar og‘irini yengil qilish, turmushini yanada farovon etish borasidagi ulkan, tizimli ishlari uchun Prezidentimizga samimiy minnatdorlik bildirdi”, — deyilgan edi mazkur uchrashuv haqidagi O‘zA axborotida.
16-fevraldan boshlab Facebook’ning o‘zbekistonlik avtohavaskorlar faol bo‘lgan “Voditeli Tashkenta (Drivers.uz)” guruhida Shodi boboning zarbof to‘n kiyib, Captiva mashinasi bilan tushgan suratlari tarqala boshladi.
Suratlarning birida Captiva O‘zbekiston Prezidenti tomonidan Shodi bobo Xushboqov xonadoniga sovg‘a qilingani aytilgan.
Mazkur xabarlar va fotosuratlar hozircha biror bir rasmiy manba tomonidan tasdiqlanganicha yo‘q.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)