Rossiyaning Oltoy o‘lkasida qahraton sovuqda qoldirib ketilgan ikki yoshli bolaning hayotini it saqlab qoldi, deb yozadi “RIA Novosti” o‘lka prokuraturasiga tayanib.

Yanvar oyida mahalliy fuqaro o‘g‘lini isitilmaydigan verandada ozuqa va kiyimsiz holda qoldirib, uyidan ketgan. Bolakay uni o‘z tanasi bilan isitgan it tufayligina tirik qolgan.

Muzlab qolayotgan bolani begona odam tasodifan ko‘rib qolgan. Ayni paytda shifokorlar tana harorati tushib ketgan bolaga yordam ko‘rsatmoqda. U sovuqda qancha vaqt qolib ketgani noma’lum.

Ona bolasini topib olganlaridan keyin to‘rt kun o‘tib, uyga qaytib keldi. Ayolga nisbatan jinoiy ish qo‘zg‘atildi, uni onalik huquqidan mahrum etish masalasi ko‘tarildi.