AQSh prezidenti Donald Tramp o‘tgan hafta Meksika prezidenti Enrike Penya Nyeto bilan telefon orqali suhbatida agar qo‘shni mamlakat qurolli kuchlari “yomon yigitlar”ni jilovlay olmasa, Amerika qo‘shinlarini yo‘naltirish bilan tahdid qildi. Bu haqda 1-fevral, chorshanba kuni Associated Press agentligi ma’lum qildi va ikki davlat yetakchilari suhbatidan parcha keltirdi, deb yozadi “TASS”.
“Davlatingizda yomon yigitlar juda ko‘p. Siz ularni to‘xtatib qolish uchun yetarlicha harakat qilmayapsiz. Harbiylaringiz ulardan qo‘rqib qolgan ko‘rinadi, bizning harbiylar esa qo‘rqmaydi, shuning uchun ularni yubora olaman”, — deb AP Trampning so‘zlaridan iqtibos keltirgandi.
Agentlikning aniqlik kiritishicha, Meksika TIV ushbu xabarning ishonchli ekanligini rad etdi. AP Oq uydan bu masalada izoh olishga erisholmadi.
O‘z navbatida, The Hill gazetasi Oq uy vakili ma’lumotiga tayanib, AQSh ma’muriyati ham Donald Tramp Enrike Penya Nyeto bilan telefon orqali suhbatida qo‘shin kiritish bilan tahdid qilganligi haqidagi ma’lumotni rad etganligini ma’lum qildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)