Australian open—2017 ni o‘zbekistonlik tennis muxlislari Denis Istominning mardonavor yurishi bilan eslab qoladigan bo‘ldi. Umuman bu turnir o‘zining kutilmagan natijalari bilan ham yodda qoladi.
“Sports.ru” ma’lumotiga ko‘ra, 1968-yildan buyon ilk bor “Katta dubulg‘a” turkumiga kiruvchi musobaqalarning yakkalikdagi finalchilari 30 yoshdan oshgan sportchilarni tashkil qildi. 30 yoshli Rafayel Nadal o‘zidan besh yosh kichik bo‘lgan Grigor Dimitrovni turnirdan chiqarib yuborgach, sal kam yarim asrdan buyon kuzatilmagan voqea nafaqat takrorlandi, balki sportchilarning umumiy yoshi borasida rekordga ham aylanib ketdi.
Nadalga qarshi hal qiluvchi o‘yinda kortga tushadigan Rojer Federer 35 bahorni qarshi olgan. Ayollar o‘rtasidagi final bellashuvlarida ishtirok etadigan opa-singil Uilyamslarning yoshi Federernikidan kam emas. Singil Serena Federer kabi 35 yoshda bo‘lsa, Vinus 36 yoshga qadam qo‘ygan.
Ma’lumot uchun, mazkur to‘rt raketka ustasi “Katta dubulg‘a” turkumiga kiruvchi to‘rt musobaqada umumiy hisobda 60 bor chempionlikni qo‘lga kiritgan. Bu ham finallarda raqobat hosil qilgan juftliklar orasidagi eng yaxshi ko‘rsatkichdir.
Izoh (0)