Janubiy Koreya muxolifati Samsung rahbarini hibsga olishdan bosh tortgan sudni tanqid qildi

Janubiy Koreyaning muxolifatdagi siyosatchilari prokuraturaning Samsung kompaniyasi vitse-prezidenti va amaldagi rahbari Li Chje Yonni hibsga olishga order berish so‘rovini rad qilgan Seul sudi qarorini tanqid ostiga oldi. Tergovchilar uni pora berish, kompaniya mablag‘ini o‘marish va yolg‘on guvohlikda gumon qilmoqda, biroq sud taqdim etilgan dalillarni yetarli emas deb hisobladi, deya xabar bermoqda “TASS”.

“Sud qarori afsuslanishga arziydi. Li Chje Yonni hibsga olishga order berishdan bosh tortish korrupsiya bo‘yicha tekshiruvning borishiga xalaqit berishi mumkin”, — deya ta’kidladi mamlakat prezidentligiga nomzodlar orasida eng mashhuri bo‘lgan Mun Chje In. 

Seul meri Pak Von Sun ham mazkur qarorni qabul qilolmasligini bildirdi. 

“Yirik korporatsiya rahbarining hibsga olinishining milliy iqtisodiyotga ta’sirini ham hisobga olish kerak, albatta. Biroq adolatning qaror topishi bundan muhimroq. Prokuraturaga Li Chje Yonni hibsga olish masalasida sudga yana bir so‘rov yuborishni maslahat bergan bo‘lardim”, — deya fikr bildirdi mansabdor.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.