Tuzatish: Dastlab samolyot Turkiyaning Turkish Airlines aviakompaniyasiga tegishli ekani haqida noaniq axborot berilgan edi, keyinroq yuk samolyoti Turkiyaning boshqa — MyCargo Airlines aviashirkatiga tegishli ekani ma’lum qilindi.
Samolyot Bishkekning “Manas” aeroportidan bir necha kilometr masofada joylashgan “Dacha” qo‘rg‘oniga qulagan. Qirg‘iziston Sog‘liqni saqlash vazirligi axborotiga ko‘ra, hodisa oqibatida kamida 32 kishi halok bo‘lgan.
Halok bo‘lganlar orasida uch nafar uchuvchi ham borligi aytilmoqda. Qirg‘iziston sog‘liqni saqlash vaziri Talantbek Botiraliyevning qayd etishicha, aviahalokat oqibatida yana sakkiz kishi jabrlangan, ularning ba’zilari bolalardir.
Qirg‘iziston hukumati tomonidan taqdim etilgan axborotga ko‘ra, samolyot qulashi oqibatida “Dacha” qo‘rg‘onida 15 ta uy vayron bo‘lgan. Hodisa joyiga mamlakat bosh vaziri So‘ronboy Jeenbekov yetib borgan.
Qirg‘iziston hukumati matbuot xizmati rahbari To‘lgonoy Stamaliyevaning “TASS”ga ma’lum qilishicha, halok bo‘lganlar va vayron bo‘lgan uylar soni bo‘yicha ma’lumot — “yakuniy emas”. Uning so‘zlariga ko‘ra, bu raqamlar “yaqin vaqt ichida yana o‘zgarishi mumkin”.
“Interfaks” axborotiga ko‘ra, aviahalokatdan so‘ng “Manas” aeroporti parvozlar uchun yopilgan. Hozirgi vaqtda Qirg‘izistonning bosh havo bandargohi “havo kemalarini qabul qilmayapti va qo‘yib yubormayapti”.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)