Ronaldu transfer bozoridagi talabgir “mahsulot” — Xames Rodrigesga “Chelsi”ga o‘tmaslikni maslahat berdi

“Real” hujumchisi Krishtianu Ronaldu jamoadoshi Xames Rodrigesni Londonning “Chelsi” klubiga o‘tishdan qaytardi, deb xabar bermoqda Marca.

London klubi “Real”da yetarlicha o‘yin amaliyotiga ega bo‘lmayotgan Xames uchun “Qirollik klubi”ga 90 million yevro taklif qilishni rejalashtirgandi. Kolumbiyalik 25 yoshli futbolchiga qaror qabul qilish uchun 7 kun muhlat berilgandi, ammo Ronaldu Xamesni “Real”da qolishga ko‘ndirdi.

• Audi’dagi Xames Bugatti haydab ketayotgan Ronalduga yo‘l bermadi (video)

“Real” bosh murabbiyi Zinedin Zidan kolumbiyalik futbolchiga uni olib qolish istagi bor ekanini aytgandi.

Men Xames bilan gaplashib, uning “Real”da – dunyoning eng yaxshi klubida qolishini xohlayotganimni aytdim.

Zinedin Zidan, “Real” bosh murabbiyi

Kolumbiyalik futbolchi “Sevilya”ga qarshi (3:0) 5-yanvarga o‘tar kechasi Ispaniya Kubogi 1/8 final ilk o‘yinida maydonga tushib, 2 ta golga mualliflik qilgandi. Shundan keyin Xames “Real”da qolishi haqida ma’lum qilgandi.

“Real”da hamma o‘yin amaliyotiga ega bo‘lishni istaydi. Hammada omadsiz davr bo‘ladi, lekin men uchun yangi yil boshlandi. Men “Real”da qolaman.

Xames Rodriges, “Real” yarim himoyachisi

• Marca so‘rovnomasida ishtirok etgan 29 ming kishining 59 foizi “Real” Xames Rodrigesni sotishi kerak deb hisoblaydi

Bir necha kun avval Xitoyning “Xebey Chayna Forchun” klubi Xames uchun “Real”dagi yillik maoshidan qariyb 10 barobar ko‘proq – 30 million yevro taklif qilgani haqida xabarlar paydo bo‘ldi. Lekin kolumbiyalik futbolchi taklifni rad etgani ta’kidlandi. Hozirda u madridliklar safida yiliga 3,5 million yevro oladi.

Qayd etish joiz, “Xebey Chayna Forchun” jamoasi “Barselona” yetakchisi Lionel Messi uchun yiliga 100 million yevro taklif qilgandi. Biroq “Xebey Chayna Forchun” Xames va Messiga qiziqayotgani haqidagi xabarlar haqiqatdan yiroq ekanini ma’lum qildi.

Avval biz Messiga, keyin Xamesga qiziqayotganimiz haqida xabarlar paydo bo‘ldi. Keyingi nishonimiz kim bo‘ladi? Krishtianu Ronaldu-mi? Katta sarlavhalar tayyorlashda bizning nomimizni ishlatishni to‘xtatinglar.

“Xebey Chayna Forchun” bayonoti

Ma’lumot uchun, Xames Rodriges joriy mavsumda Ispaniya chempionatining atigi 9 o‘yinida, shulardan 4 tasida asosiy tarkibda maydonga tushib, 1 ta gol va 3 ta golli uzatmaga mualliflik qildi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.