O‘zbekiston Prezidenti Shavkat Mirziyoyev 25-dekabr kuni Navoiy viloyatidagi yirik sanoat korxonalari faoliyati bilan tanishdi. Bu haqda TIV matbuot xizmati xabar bermoqda.
Prezident dastlab “Navoiy kon-metallurgiya kombinati” davlat korxonasiga tashrif buyurdi. Kombinatda so‘nggi yillarda amalga oshirilgan keng ko‘lamli ishlar, iqtisodiy ko‘rsatkichlar va istiqboldagi rejalar bilan tanishdi.
Shavkat Mirziyoyev, shuningdek, “Navoiyazot” aksiyadorlik jamiyatida amalga oshirilayotgan yangi yirik loyihalar bilan tanishdi. Birinchi loyiha kaustik soda va metanol ishlab chiqarishga yo‘naltirilgan bo‘lib, yiliga 260 million dollarlik mahsulot tayyorlash o‘zlashtiriladi. 900 dan ortiq yangi ish joyi tashkil etilishi ko‘zda tutilgan mazkur loyiha to‘la mahalliylashtirish dasturi asosida ishlaydi. Ikkinchi loyiha doirasida ammiak karbamid ishlab chiqarish yo‘lga qo‘yiladi. Yiliga 173 million dollarlik mahsulot tayyorlash imkonini beradigan mazkur korxonada 500 ga yaqin ish o‘rni tashkil etiladi.
Davlat rahbari mazkur yangi loyihalarni tez va sifatli amalga oshirish iqtisodiyot rivojida muhim ahamiyat kasb etishini ta’kidladi.
Prezident “Navoiy” erkin iqtisodiy zonasida bo‘lib, bu yerdagi korxonalarda ishlab chiqarilayotgan mahsulotlar namunalarini ko‘zdan kechirdi.
Bugungi kunda “Navoiy” erkin iqtisodiy zonasida 18 korxona samarali faoliyat yuritmoqda. Ushbu korxonalarda 100 dan ortiq turdagi raqobatbardosh mahsulotlar ishlab chiqarilmoqda.
2015-yilda mazkur iqtisodiy zonadagi korxonalar tomonidan 184 milliard so‘mlikdan ortiq mahsulot ishlab chiqarilib, 5 million dollarlik mahsulot eksport qilingan.
Prezident iqtisodiy zona faoliyatini yanada takomillashtirish, xorijlik yangi hamkorlarni jalb etish borasidagi ishlarni jadallashtirish lozimligini, istiqboldagi vazifalar g‘oyat salmoqli ekanini alohida ta’kidladi. Iqtisodiy zonada yaratilgan ulkan imkoniyatlar, imtiyozlar, shart-sharoitlardan to‘la, samarali foydalanish zarurligi, bu iqtisodiyot uchun muhim ahamiyatga ega ekani qayd etildi.
Shavkat Mirziyoyev “Navoiy” erkin iqtisodiy zonasida 2017-yilda ishga tushirilishi rejalashtirilgan 15 loyiha bilan tanishar ekan, ularning zamonaviy texnologiyalarni o‘zlashtirish, iqtisodiyotni diversifikatsiya qilish, importni qisqartirish va eksport hajmini oshirishdagi ahamiyati katta ekanligini alohida ta’kidladi. Iqtisodiy zona faoliyatini yanada rivojlantirish va takomillashtirish yuzasidan mutasaddi rahbarlarga tegishli topshiriqlar berdi.
Izoh (0)