Korrupsiyada ayblanib Angliya milliy terma jamoasidan chetlashtirilgan Sem Ellardays “Kristal Pelas” bosh murabbiyi bo‘ldi

Angliyaning “Kristal Pelas” klubi iste’foga chiqarilgan Alan Pardyuning o‘rnini Sem Ellardaysga ishonib topshirdi. Jamoa rasmiy sayti mutaxassis bilan 2,5 yillik shartnoma imzolangani haqida xabar berdi.

Avvalroq Sem Ellardays korrupsiya mojarosiga aralashib qolib, Angliya milliy terma jamoasidagi kursisini bo‘shatib qo‘ygandi. Endilikda uning vazifasi mavsumni ko‘ngildagidek boshlay olmagan “Kristal Pelas”ni oyoqqa turg‘azish bo‘ladi.

“Kristal Pelas” yakuniga yetgan 17-turdan keyin Angliya Premyer-Ligasida 17-o‘rinni egallab turibdi. “Burgutlar” 26-dekabr kuni “Uotford” maydonida mehmon bo‘ladi va o‘sha uchrashuv Sem uchun klubdagi debyut sanaladi.

62 yoshli Sem Ellardays uchun bu Premyer-Ligada to‘p suradigan oltinchi jamoa bo‘ldi va u bu borada yaqqol rekordchiga aylandi. Hozirga qadar hech bir mutaxassisga Angliya elitasining olti klubini boshqarish nasib qilmagandi.