Ukrainalik afsonaviy bokschi Vladimir Klichko Rojdestvo bayrami arafasida eng keksa muxlisasi – 111 yoshli gamburglik Lidiye Smuda bilan uchrashdi. Bu haqda “Klitschko-brothers.com” xabar bermoqda.
“Bizning uchrashuv har ikkimizning Rojdesto bayrami uchun niyatimiz edi. Eng keksa muxlisam Smuda xonim muvaffaqiyatga o‘rganish mumkinligini aytdi!”, – dedi Vladimir Klichko.
Eslatib o‘tamiz, 2015-yilning noyabr oyida Vladimir Klichko britaniyalik Tayson Fyuriga qarshi 12 raundlik jangda hakamlarning yakdil qarori bilan imkoniyatni boy berib, IBF, WBA va WBO chempionlik kamarlaridan mahrum bo‘lgandi. Ma’lum muddatdan so‘ng, britaniyalik bokschi majburiy jang o‘tkazishdan bosh tortgani uchun IBF kamaridan mahrum etilgan edi.Fyurining ukrainalik Vladimir Klichko bilan revash jangi avval 9-iyuldan 29-oktabrga, keyinroq esa 29-oktabrdan noma’lum muddatga qoldirilgan edi. Jang qoldirilishining sababi sifatida avval Fyurining jarohati, keyin esa uning ruhiy tushkunlikka tushgani ko‘rsatilgan.
Keyinroq britaniyalik sportchining doping namunasida kokain moddasi topildi. Bokschi giyohvand moddalarni ruhiy tushkunlikka tushgani uchun qabul qilganini tan oldi. Orada Tayson Fyuri karyerasini yakunlagani haqida ma’lum qilib, bir necha soatdan keyin buning hazil ekanini aytishga ham ulgurdi. 13-oktabrga o‘tar kechasi esa Fyuri barcha chempionlik kamarlaridan voz kechib, tushkunlik holatidan tiklanish va sog‘lig‘iga e’tibor qaratishini ma’lum qilgandi.
Vakant bo‘lib turgan WBA, WBO va IBF kamarlari uchun Vladimir Klichko AQSh vakili Entoni Joshua bilan jang qiladi. Mazkur jang 2017-yilning 29-aprelida, Londondagi 90 ming muxlisga mo‘ljallangan “Uembli” stadionida bo‘lib o‘tadi.
Ma’lumot o‘rnida, 40 yoshli Vladimir Klichko professional ringda 68 jang o‘tkazib, 64 tasida (53 tasida nokaut bilan) g‘alaba qozongan va 4 tasida mag‘lubiyatga uchragan. 27 yoshli Entoni Joshua professional ringdagi 18 ta jangining barchasida nokaut bilan g‘alaba qozongan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)