Madridning “Real” jamoasi hujumchisi Krishtianu Ronaldu France Football nashri tomonidan yilning eng yaxshi futbolchisiga beriladigan “Oltin to‘p” sohibiga aylandi, deb xabar bermoqda “Chempionat”.
31 yoshli hujumchi 2015/16-yilgi mavsumda “Real” bilan YChL g‘olibi, Portugaliya terma jamoasi bilan esa Yevro–2016 chempioni bo‘ldi. Bundan tashqari, u o‘tgan mavsumda 48 o‘yinda maydonga tushib, 51 ta gol va 17 ta golli uzatmaga mualliflik qilgan.
“Chempionat”ning ta’kidlashicha, ovoz berish jarayonida butun dunyodan 173 nafar OAV vakili ishtirok etdi. Unga ko‘ra, Ronaldu 745 ochko to‘pladi va “Oltin to‘p–2016” mukofotiga loyiq deb topildi. “Barselona” yetakchisi Lionel Messi 316 ochko bilan ikkinchi, “Atletiko” hujumchisi Antuan Grizmann 198 ochko bilan uchinchi o‘rinni egalladi.
“Oltin to‘p–2016” sovriniga da’vogarlik qilgan futbolchilarning ochkolar bo‘yicha ro‘yxati quyidagi ko‘rinishni oldi.
1. Krishtianu Ronaldu (“Real”, Portugaliya termasi)2. Lionel Messi (“Barselona”, Argentina termasi)3. Antuan Grizmann (“Atletiko”, Fransiya termasi)4. Luis Suares (“Barselona”, Urugvay termasi)5. Neymar (“Barselona”, Braziliya termasi)6. Garet Beyl (“Real”, Uels termasi)7. Riyad Mahrez (“Lester Siti”, Jazoir termasi)8. Jeymi Vardi (“Lester Siti”, Angliya termasi)9-10. Janluiji Buffon (“Yuventus”, Italiya termasi) va Pepe (“Real”, Portugaliya termasi)11. Pyer-Emerik Obameyang (“Borussiya” Dortmund, Gabon termasi)12. Ruy Patrisiu (“Sporting”, Portugaliya termasi)13. Zlatan Ibrahimovich (“Manchester Yunayted”, Shvetsiya termasi)14–15. Pol Pogba (“MYu”, Fransiya termasi) va Arturo Vidal (“Bavariya”, Chili termasi)16. Robert Levandovski (“Bavariya”, Polsha termasi)17–19. Toni Kroos (“Real”, Germaniya termasi), Luka Modrich (“Real”, Xorvatiya), Dimitri Payet (“Vest Xem”, Fransiya).
Portugaliyalik futbolchi “Real” Yaponiyada davom etayotgan klublar o‘rtasidagi jahon chempionatida qatnashayotgani uchun, 12-dekabr kuni bo‘lib o‘tgan “Oltin to‘p–2016” taqdimot marosimida ishtirok eta olmasligi xabar qilingandi.
Ronalduga mukofot “Real”ga tegishli “Santyago Bernabeu” stadionining muzeyida topshirilgani bois, uning “Oltin to‘p–2016”ni qo‘lga kiritishi oldinroq ma’lum bo‘lganini taxmin qilish mumkin.
2016-yilgi “Oltin to‘p” mukofotiga da’vogarlik qilgan yana 11 nomzod — Ugo Lyoris (“Tottenhem”, Fransiya termasi), Serxio Ramos (“Real”, Ispaniya termasi), Kevin De Bryuyne (“Manchester Siti”, Belgiya termasi), Paulo Dibala (“Yuventus”, Argentina termasi), Diyego Godin (“Atletiko”, Urugvay termasi), Andres Inyesta (“Barselona”, Ispaniya termasi), Koke (“Atletiko”, Ispaniya termasi), Gonsalo Iguain (“Yuventus”, Argentina termasi), Tomas Myuller (“Bavariya”, Germaniya termasi), Manuel Noyer (“Bavariya”, Germaniya termasi) va Serxio Agueroga (“Manchester Siti”, Argentina termasi) hech qaysi bir jurnalist ovoz bermadi.
Qayd etish joiz, Krishtianu Ronaldu faoliyati davomida to‘rtinchi marta “Oltin to‘p” sohibiga aylandi. Bunga qadar u 2008, 2013 va 2014-yillarda ushbu mukofotga loyiq deb topilgandi.
“Oltin to‘p” sovrinini qo‘lga kiritish bo‘yicha “Barselona”ning argentinalik hujumchisi Lionel Messi hamon yetakchilik qilmoqda. 29 yoshli futbolchi 2009, 2010, 2011, 2012 va 2015-yillarda, jami 5 marta “Oltin to‘p”ni qo‘lga kiritgan.
[playbuzz-item playbuzz_url="https://www.playbuzz.com/muhrima10/messi-va-ronaldu-erasiga-qaysi-futbolchi-yakun-yasab-beradi"]
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)