WSJ: Pentagon Tramp uchun IShIDga qarshi kurashni kuchaytirishga qaratilgan qator takliflarni tayyorlamoqda
Pentagon AQSh tomonidan IShID terrorchilik guruhiga qarshi olib borilayotgan harbiy kampaniyani kuchaytirishga qaratilgan qator takliflarni tayyorlamoqda, ularni u mamlakatning saylangan prezidenti Donald Trampga taqdim etmoqchi, deb yozadi “TASS”.
The Wall Street Journal ma’lumotlariga ko‘ra, ushbu takliflar, shu jumladan, Oq uyning jang maydonida taktik va boshqa harbiy qarorlar ustidan nazoratini susaytirish hamda ushbu planda Pentagonga ustunlik taqdim etishni o‘z ichiga oladi.
AQSh mudofaa vazirligi Trampga ko‘rib chiqish uchun taqdim etadigan o‘zgarishlar, shuningdek, qandaydir muayyan operatsiyani amalga oshirishga yo‘naltiriladigan harbiy xizmatchilar soniga aloqador cheklovlarni susaytirishdan ham iborat bo‘lishi mumkin. Bundan tashqari, Pentagon aviazarbalar berish yoki turli jangovar missiyalar o‘tkazish uchun yakuniy ruxsat berish oldidan Vashingtonda o‘tkaziladigan tekshiruvlarning sonini va puxtalik darajasini kamaytirishni ham taklif etishi mumkin.
Gazeta ma’lumotlari bo‘yicha, potensial tavsiyalar amalga oshgan taqdirda, AQShning IShIDga qarshi kurash bo‘yicha umumiy strategiyasini tubdan o‘zgartirmaydi, ammo harbiylarga bevosita jang maydonida qarorlar qabul qilish chog‘ida ko‘proq erkinlik berishi mumkin.
