Eron milliy terma jamoasidagi o‘yinlari orqali o‘zbekistonlik futbol muxlislariga tanish bo‘lgan Sardor Azmun 5 yil muqaddam Rossiyaga ko‘chib o‘tgandi. Mana shu muddat ichida u birorta nashr bilan suhbatda bo‘lmagan, asosan klub matbuot xizmatiga kichik intervyular bergan.
Rossiyaning “R-Sport” nashi ilk marta Azmun bilan suhbat uyushtirdi va bir qator qiziqarli savollar bilan murojaat qildi. Quyida “Atletiko”, “Bavariya” kabi klublar darvozasiga gol ura olgan hujumchi tomonidan bildirilgan fikrlar bilan tanishish mumkin.
“Rossiyaga otam va onam bilan ko‘chib keldim. Opam, uning turmush o‘rtog‘i va bobom Eronda qoldi. Vaqti-vaqti bilan bizni ko‘rgani kelib turishadi. Ota-onamga Rossiya yoqadi, ular Eronga qaytishni istamaydi. Menga Eron yoqadi, biroq Rossiyada yashash yaxshiroq”.
“Ota-onamning ishlashini xohlamayman. Men tug‘ilgan shaharda otam voleybol klubini boshqargan. Unga hurmat bilan munosabatda bo‘lmaganlaridan keyin, ishlamasligini so‘radim. Ishlab topgan pullarimning hammasini ularga beraman”.
“O‘yinlarimni ko‘rish uchun ba’zida 20—30 nafar qarindoshlarimni taklif qilaman. ‘Atletiko’ga qarshi o‘yinimizni ko‘rish uchun barcha yaqinlarim Rostovga keldi. Ularning tashrifidan xursand bo‘laman. Mening ajoyib oilam bor”.
“Rossiya va Eron bir-biridan tubdan farq qiladi, madaniyatda farq 90 foiz deyishim mumkin. Eronda odamlar juda ochiq. Ular his qilayotganini boshqalar bilan bo‘lishishni istaydi. Rossiyada esa hattoki baxtli insonlar ham buni baham ko‘rmaydi. Eronda odamlar ko‘pchilik bo‘lib ulfatchilik qiladi, Rossiyada buni ko‘rmadim”.
“Dinimni bu yerda hurmat qilishadi — bu eng muhimi. Men ham o‘zgalarni hurmat qilaman. Men uchun insonning qaysi dinga itoat etishi muhim ahamiyatga ega emas”.
Eronlik futbolchi Ashkan Dejaga “Volfsburg” sharafini himoya qilayotganida Isroil safariga borishdan bosh tortgan. Jurnalist shu savol bilan Azmunga murojaat qildi:
“Ha, Eron va Isroil munosabatlari yaxshi emas. Ammo men bunday qilmagan bo‘lardim. Mening isroillik do‘stim bor — Bibras Natxo. Uni hurmat qilaman, ajoyib yigit. Mamlakatlarimiz o‘rtasidagi munosabat bizga ta’sir qilmaydi”.
“Men Yaratganga ishonaman, bu mening shaxsiy ishim. Boshqalarni so‘roq qilmayman, sizning musulmon, xristian yoki boshqa din vakili ekaningiz muhim emas. Muhimi yaxshi inson bo‘la olish. Musulmon bo‘la turib yomon bo‘lish bu nimasi? Men shuning uchun ham yaxshi bo‘lishim shart. Xristianlarda ham shunday”.
“Onam nazorat qilishni yoqtiradi. Men uchun qayg‘uradi, chunki uning yagona o‘g‘liman. Menga biror narsani ta’qiqlamaydi, shunga qaramay har bir gapiga quloq tutaman”.
“Eronda futbol va futbolchilarni qadrlashadi. 100 ming odam keladigan o‘yinlarimiz bor, sherigingni ham eshita olmay qolasan. Rossiyada buni ko‘rmadim”.
Sardor Azmunni Instagram tarmog‘ida 1,3 million obunachi kuzatib boradi. Bu borada u birinchi raqamli futbolchi.
“Yaqin do‘stim Mehdi Taremining kuzatuvchilari menikidan biroz kamroq. Uning nima uchun hali ham Eronda o‘ynayotganini tushunmayman. Yevropaga ketishini istardim. Imkoni bo‘ladi, albatta. 24 yoshda. Alirizo Jahonbahsh ham shunday”.
“Eron milliy terma jamoasidagi birinchi uchrashuvim juda rasvo kechgan. Chernogoriya bilan o‘ynagandik. Jahon Chempionati arafasida bo‘lgani uchun qo‘llarim qaltirab turgan, hayajonlanganman”.
“Eron termasida har bir futbolchi muhim. Birinchi navbatda jamoa turadi. Shuning uchun Osiyoda eng yaxshimiz. O‘yinchilar jamoaga yordam berish uchun hamma narsaga tayyor. Men asosiy futbolchi emasman, o‘ynamay qolsam, o‘rnimda yaxshiroq kimdir harakat qilayotganiga ishonaman”.
“Arturo Vidal, Aleksis Sanches, Klaudio Bravo maydonda bor paytda Chili terma jamoasini 2:0 hisobida mag‘lub etgandik. Osiyoda iqtidorlar ko‘p. Masalan, Braziliya ham biz kabi o‘ynaydi. Nega endi uni yuta olmasligimiz kerak? Murabbiylar aytganini to‘liq bajara olsak, buni uddalash mumkin”, — dedi o‘ziga ishonadigan Sardor Azmun.
Ma’lumot uchun, futbolchining xizmati bilan ayni vaqtda “Liverpul” klubi qiziqib qolgan.
Izoh (0)