Royal Bank of Scotland 8 yil oldingi qallobliklar uchun 1 mlrd dollar tovon to‘laydi

The Royal Bank of Scotland (RBS Group) aksiyadorlarni chalg‘itish borasidagi ayblovlar munosabati bilan 800 million funt sterling (1 milliard dollar) miqdorida tovon puli to‘laydigan bo‘ldi. Bu haqda, Bloomberg agentligiga asoslanib, “TASS” xabar bermoqda.

Aytilishicha, RBS besh aksiyadorlar guruhining uchtasi bilan kelishuvga erishdi, qolganlari bilan muzokaralar davom etmoqda.

RBS Buyuk Britaniyaning moliyaviy inqirozdan eng katta zarar ko‘rgan moliyaviy tashkilotlaridan biri bo‘ldi va hukumatdan 46 milliard funt sterling miqdorida yordam oldi. Buning natijasida davlat bankning eng yirik aksiyadoriga aylandi.

Aksiya egalarining da’vosiga ko‘ra, 2008-yilda bank kapitalni qo‘llab-quvvatlash maqsadida qo‘shimcha mablag‘ kiritishni so‘rab ularga murojaat qilib, moliyaviy ahvoli yuzasidan yanglish ma’lumotlar taqdim etgan. Aksiyadorlarga bankning yangi aksiyalarinin donasiga 2 funt bahosida xarid qilish taklif etilgan, vaholanki jahon moliyaviy inqirozidan so‘ng aksiyalar qiymati bir necha barobarga tushib ketgan edi.