Tadbirkorlar va ishbilarmonlar harakati — O‘zbekiston Liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyevning ishonchli vakili Ikromxon Najmiddinov Namangan viloyati, Yangiqo‘rg‘on tumani saylovchilari bilan uchrashdi. Bu haqda tuman hokimligi axborot xizmati ma’lum qildi.
Uchrashuvda Prezidentlikka nomzodning ishonchli vakili yig‘ilganlarni Shavkat Mirziyoyevning tarjimai holi va saylovoldi dasturi bilan tanishtirdi.
Dasturda mamlakatda tinchlik va hamjihatlikni mustahkamlash, davlat va jamiyat boshqaruvi tizimini takomillashtirish, qonun ustuvorligini ta’minlash va sud-huquq tizimini isloh etish, iqtisodiy islohotlarni chuqurlashtirish va ijtimoiy sohani rivojlantirishga qaratilgan vazifalar belgilangan.
Jamoatchilik nazoratini kuchaytirish, odil sudlovni ta’minlash, ijro hokimiyati faoliyati samaradorligini oshirish, iqtisodiyotni modernizatsiya qilish, mahalliy budjet daromad bazasini kengaytirish, tadbirkorlikni rivojlantirish, eksportga e’tiborni kuchaytirish, aholi farovonligini yuksaltirish va bandligini ta’minlash kabi masalalar o‘z ifodasini topgan.
Tuman tibbiyot birlashmasi boshlig‘i L.Ahmedova, O‘zbekiston xalq o‘qituvchisi A.Xolmatov, faxriylar M.Ahmadjonov, M.Yoqubboyev va boshqalar nomzodning dasturida belgilangan ustuvor vazifalar xususida fikr bildirdi.
Uchrashuvda nomzodning ishonchli vakili O‘zbekiston Respublikasi Prezidenti sayloviga tayyorgarlik ko‘rish bilan bog‘liq jarayonlar milliy qonunchilik va xalqaro demokratik tamoyillarga mos ravishda o‘tayotganligini qayd etdi. Saylovchilarning ko‘plab savollariga batafsil javob qaytardi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)