Magnus Karlsen 26 yoshini qarshi olgan kuni shaxmat bo‘yicha jahon chempioni unvonini saqlab qoldi

Norvegiyalik shaxmatchi Magnus Karlsen rossiyalik Sergey Karyakinga qarshi jahon chempionligi uchun kechgan bahsda g‘alaba qozonib, chempion unvonini saqlab qoldi, deb xabar bermoqda “Sports.ru”.

Jahon chempionligi uchun 12 partiyadan iborat klassik shaxmat bo‘yicha bahslarda 6:6 hisobi qayd etilgandi. Shundan so‘ng shaxmatchilar 4 partiyadan iborat tay-breyk o‘ynadi.

Qoidaga ko‘ra, tay-breyk rapid, ya’ni, tezkor uslubda o‘ynaladi. Ushbu yo‘nalishda kuchli sanalgan Magnus Karlsen 3:1 hisobida Karyakinni mag‘lubiyatga uchratdi va chempionlik unvonini saqlab qoldi.

Qayd etish joiz, norvegiyalik shaxmatchi 30-noyabr, chempionlik unvonini saqlab qolgan kuni 26 yoshga to‘ldi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.