Paketlarga soliq solinganidan so‘ng Buyuk Britaniya plyajlari ancha ozoda holga keldi

Oxirgi bir yilda Buyuk Britaniya plyajlariga tashlab ketiladigan plastik paketlar miqdori sezilarli darajada kamaydi. Bu haqda Birlashgan Qirollik dengiz muhitini asrash jamiyati bayonot tarqatdi, deb xabar beradi “TASS”.

Oxirgi hisobotga ko‘ra, qirg‘oq chizig‘ining har 100 metriga yettitadan paket to‘g‘ri keladi, bu esa 2015-yildagidan 40 foizga kamroqdir — unda bu ko‘rsatkich 11 taga teng edi.

Bundan tashqari, bu oxirgi o‘n yil ichidagi eng past ko‘rsatkichdir.

Umuman olganda, hisobot davrida Buyuk Britaniya plyajlarida chiqindilar miqdori 4 foizga kamaydi.

Mutaxassislarning fikricha, bunday natijaga erishilishining asosiy sababi bir yil muqaddam hukumat supermarketlarga xaridorlardan plastik paketlar uchun donasiga kamida besh pens miqdorida to‘lov undirish majburiyatini kiritgani bo‘ldi. Birlashgan Qirollik dengiz muhitini asrash jamiyati mazkur soliqni joriy etishning asosiy tarafdorlaridan biri edi.

Soliq joriy etilganidan keyingi yarim yil ichida Buyuk Britaniya supermarketlarida plastik paketlarga bo‘lgan talab 85 foizga qisqarib, ularning sotilish ko‘rsatkichlari 7 milliarddan 500 million donaga tushdi.