Hindiston bosh vaziri Narendra Modi Ind daryosi havzasidagi uning mamlakatiga tegishli uchta daryoning suvi to‘liq hind dehqonlari tomonidan ishlatilishi va Pokistonga boshqa oqib bormasligiga va’da berdi, deb yozadi “TASS”.
“Satlej, Bias va Ravi daryolari suvi Hindistonga va bizning dehqonlarimizga tegishli, — dedi Modi. — Bu suvning (Pokistonga oqadigan) har bir tomchisi to‘xtatiladi. Men uni Panjob hamda Jammu va Kashmir dehqonlariga — hindistonlik dehqonlarga beraman”.
Bosh vazir ta’kidlashicha, hukumat maqsadi “hind suvining har bir tomchisi” Hindiston fuqarolariga kelib tushishiga erishishdan iborat bo‘lgan maxsus ishchi guruh tuzadi.
Ind daryosi havzasi suvi bo‘yicha bahs 1947-yil — Britaniya Hindistoni mustaqillikka erishgach, diniy belgisiga qarab Hindiston va Pokistonga ajralib ketganidan buyon davom etib kelmoqda. Irmoqlari bo‘lgan ushbu daryo suvini bo‘lib olish haqidagi kelishuvni ikki mamlakat 1960-yilda Xalqaro tiklanish va taraqqiyot banki vositachiligida imzolagan edi. Islomobod Ind daryosi, shuningdek, Hindiston hududidan oqib keluvchi Chinob va Jalom irmoqlari ustidan nazoratni qo‘lga kiritdi, biroq Hindiston, kelishuvga ko‘ra, ularning suvidan yondosh dalalarni sug‘orish va chegaradosh tumanlar fuqarolari ehtiyojlari uchun foydalanish huquqiga ega. Nyu-Deli Beas, Ravi va Satlej daryolari ustidan to‘liq nazoratga ega bo‘ldi.
Shunga qaramay, Hindiston o‘zini Pokistonga oqayotgan suvlarga nisbatan o‘z huquqlaridan to‘liq foydalanmayapti deb hisoblaydi. O‘z navbatida, Islomobod hindistonliklar bitim bo‘yicha suvi o‘ziga tegishli daryolardan shundoq ham juda ko‘p foydalanayapti, degan fikrda, shu tufayli bu borada tez-tez xavotir bildirib turadi.
Izoh (0)