24-noyabr, payshanba kuni NATO bosh kotibi Yens Stoltenberg alyansning kengayishini provokatsiya deb hisoblayotgan Moskva pozitsiyasiga qo‘shilmasligini ma’lum qildi. Bu haqda “Interfaks” xabar bermoqda.

“Rossiyada NATOning Markaziy va Sharqiy Yevropada kengayishini provokatsiya ekanligi haqidagi fikr bildirilishini tushunmayman”, — dedi u Oksford universitetidagi ma’ruzasida.

Stoltenberg har bir mamlakat o‘z yo‘lini o‘zi tanlashini eslatib o‘tdi.

“Bu NATOning kengayishi emas, balki Polsha, Estoniya, Latviya, Litva, Vengriyaning alyansga qo‘shilish istagini bildirganligidir”, — deya tushuntirish berdi bosh kotib.

U na Rossiya, na boshqa davlatlar qo‘shni davlatlarning taqdirini hal etish huquqiga ega emasligini ta’kidlab o‘tdi.

“Rossiya qo‘shnilar o‘z yo‘lini o‘zi tanlashi mumkinligini qabul qilishi va tinchlanishi kerak”, — dedi Stoltenberg.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.