Rossiyaning Sankt-Peterburg shahri politsiyasi 100 yoshli nafaqaxo‘rga bank hisobidan o‘g‘irlab ketilgan 2,5 million rubl miqdoridagi jamg‘armalarini qaytarib berdi. Qalloblik sxemasida advokat bo‘lib ishlayotgan sobiq politsiyachi, bank xodimasi va sud nozirlari ishtirok etgan edi, deb xabar beradi TJournal.
Beshta orden sohibi bo‘lmish faxriy Konstantin Zemskovning pullari 2015-yili o‘g‘irlangan edi. Yil oxirida u bankka kelib, bir qism pullarini naqdlashtirmoqchi bo‘lgan edi. U yerda keksa insonga hisobida pul yo‘qligi, barcha mablag‘lar sud qaroriga ko‘ra yechib olingani xabar qilindi.
Nafaqaxo‘r politsiyaga ariza yozdi, ammo u ham 2016-yil yoziga qadar uchastka nozirining xonasida chang bosib yotdi. Shundan so‘ng shikoyat tuman prokuroriga yetib bordi. Prokuror ushbu shikoyat haqida rahbariyat ishtirokida o‘tgan yig‘ilishlardan birida aytib o‘tdi. Oliy martabali politsiyachilar qalloblikni darhol fosh etishga ko‘rsatma berdi.
2016-yilning 20-sentabr kuni Viborg tuman IIB tergov boshqarmasi ish qo‘zg‘atdi.
Tergovning aniqlashicha, 2015-yil 5-iyulda faxriydan 2,527 million rubl jarima olish to‘g‘risida ijro qog‘ozi chiqarilgan. Bu — nuroniyning hisobida bor pullarning aniq raqamidir.
Sud ijrochilari axborotni tekshirib o‘tirmay, ko‘rsatilgan summani da’vogar foydasiga Zemskovning hisobidan yechib olgan. Ammo pulni da’vogar emas, boshqa odam ishonchnoma asosida olishi lozim edi. Oxir-oqibat mablag‘ni mahalliy yuridik firma xodimasi hisobdan yechib olgan.
Vositachilar silsilasi orqali tergovchilar bosh firibgarga chiqa oldi. U ilgari politsiyada ishlagan peterburglik advokat Dmitriy Karapats bo‘lib chiqdi.
23-noyabr kuni Karapatsning qo‘lga olinishi asnosida sud ijrochilari ham tintuv qilindi. Tekshiruvsiz pulni yechib olgan xodimlar so‘roqdan o‘tkazildi.
Advokat uyining oldida qo‘lga olindi. Politsiyachilarni ko‘rgan Karapats qochishga urindi va hatto telefonini sindirdi, ammo baribir qo‘lga olindi, uning telefonidan esa tergov uchun foydali ma’lumotlar topildi.
Karapats bergan ko‘rsatmalar asosida aniqlashtirilishicha, 2015-yil yozida u internetda 2009-yil ijro qog‘ozi namunasini topib, shu asosda soxta hujjat tayyorlagan. Nafaqaxo‘rning hisobidagi pullar haqidagi ma’lumotni qallobga mahalliy bank xodimasi bergan. Pulni esa hisobdan advokatning tanishi, yuridik firmada ishlaydigan ayol yechib olgan. Karapats nafaqaxo‘r olamdan o‘tgan deb o‘ylab, uning pullariga ega chiqmoqchi bo‘lganini e’tirof etmoqda.
25-noyabr kuni jabrlanuvchi Karapats bilan uchrashdi. Qallob advokat faxriydan uzr so‘radi.
Tergovchilar, shuningdek, Karapats kamida yana bitta yirik qalloblikka aloqadorligini aniqladi.
Izoh (0)