Finlyandiyaning Nokia transmilliy kompaniyasi smartfonlarni chiqarishga 2017-yilda qaytishni boshlamoqchi. Bu haqda Nokia Power User yangiliklar portali kompaniyaning investorlar uchun mo‘ljallangan taqdimotiga tayanib xabar berdi, deb yozadi “TASS”.
2017-yilgi rejalar haqidagi taqdimotda “Nokia brendidagi smartfonlarga qaytish” bandi ham mavjud. Yangi telefonlar Android platformasida chiqarilishi kutilmoqda.
Shu yil avvalroq ham Nokia smartfonlar, shuningdek, planshet kompyuterlari bozoriga qaytishga tayyorlanayotgani haqida ma’lum qilgan edi. “Brend huquqi va intellektual mulkni litsenziyalashga aloqador strategik kelishuvga muvofiq, Nokia Technologies (Nokia bo‘linmalaridan biri) Finlyandiyada yaratilgan yangi HMD Global Oy kompaniyasiga Nokia brendi ostida telefonlar va planshetlar ishlab chiqish uchun eksklyuziv global litsenziyani taqdim etadi”, — degan edi kompaniya o‘shanda.
Nokia mobil qurilmalar sotuvidan doimiy ravishda pul kompensatsiyalarini qabul qiladi. HMD kelasi uch yil davomida Nokia markasi ostidagi mahsulotlarni dunyo bozorida ilgari surish uchun 500 million dollar investitsiya kiritishni rejalashtirmoqda.
Izoh (0)