Shu yilning 27—28-dekabr kunlari BAAning Dubay shahrida 2010-yildan buyon o‘tkazib kelinayotgan Globe Soccer Awards taqdirlash marosimining oltinchisi bo‘lib o‘tadi. Loyiha rasmiy sayti g‘oliblik uchun kurash olib boradigan nomzodlar nomiga oydinlik kiritdi.
Yevropa futbol agentlari assotsiatsiyasi hamda qit’a klublar assotsiatsiyasi tomonidan o‘tkazib kelinadigan taqdirlashda yilning eng yaxshi futbolchisi bo‘lish uchun Jeymi Vardi, Gonsalo Iguain, Lionel Messi, Krishtianu Ronaldu, Garet Beyl va Antuan Grizmann raqobatlashadi.
Murabbiylar raqobati esa Zinedin Zidan, Klaudio Ranyeri, Fernandu Santush, Massimiliano Allegri va Unai Emeri bilan yuzaga chiqadi. Yilning eng zo‘r klublari bo‘lish uchun “Real”, “Lester”, “Sevilya”, “Molde” va “Legiya” harakat qiladi.
Loyiha, shuningdek, eng yaxshi FIFA hakamlarini ham taqdirlaydi. Nomzodlar orasida Mark Klattenburg (Angliya), Bakari Gassama (Gabon), Nestor Pitana (Argentina), Xoel Agilar (Salvador) hamda Alirizo Fag‘oniy (Eron)ni uchratish mumkin.
Ma’lumot uchun, o‘zbekistonlik FIFA referisi Ravshan Ermatov bir yil muqaddam Globe Soccer Awards sovrinini qo‘lga kiritgan bo‘lib, keyinroq Toshkentda unga Malibu avtomashinasi sovg‘a qilingandi. 2016-yilgi mavsumda Ermatov OFKning yillik taqdirlash marosimiga taklif etilgan nomzodlar orasida ham ko‘rinish bermagan. U bunga qadar Osiyoning to‘rt bor eng yaxshi hakami deb topilgandi.
Izoh (0)