“Barselona” jamoasi hujumchisi Lionel Messi Yangi yil bayramidan so‘ng kataloniyaliklar bilan shartnomasini uzaytirish borasida muzokara o‘tkazishga tayyor. Bu haqda Ispaniyaning Sport nashriga tayanib, “Chempionat” xabar bermoqda.
Xabarda qayd etilishicha, Argentina termasi sardori jamoaning boshqa a’zolari – Luis Suares, Mark-Andre ter Shtegen, Ivan Rakitich va Andres Inyesta bilan kelishuv muddatlari uzaytirilishini kutib turmoqchi. Yuqorida ismi keltirilgan futbolchilarning kelishuv muddatlari 2021-yilgacha uzaytirilishi kutilmoqda.
Avvalroq 29 yoshli futbolchi “Barselona” bilan kelishuv muddatini uzaytirmaslikka qaror qabul qilgani haqida xabar berilgandi. Keyinroq Goal nashrining Messiga yaqin bo‘lgan manbasi bu haqiqat emasligini bildirdi.
Eslatib o‘tamiz, Lionel Messining “ko‘k-anor ranglilar” bilan amaldagi shartnomasi 2018-yilning yoziga qadar mo‘ljallangan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)