CNN Londonda Trampning “maxfiy siyosiy quroli”ni aniqladi

Respublikachilar partiyasidan AQSh prezidentligiga nomzod Donald Tramp saylov shtabida “maxfiy siyosiy qurol” bor. Bu Londonda joylashgan Cambridge Analytica firmasi bo‘lib, u sentabr oyida o‘z xizmatlari uchun 5 million dollardan ziyod mablag‘ni qo‘lga kiritdi. Bu haqda CNN telekompaniyasiga tayanib, “TASS” xabar berdi.

Uning ma’lumotlariga ko‘ra, Cambridge Analytica o‘z mutaxassislari turli tahlil uslublari yordamida amerikalik saylovchilarni 8-noyabr kungi umumiy saylovlarda Trampga ovoz berishga ko‘ndirishga qodir ekanligini ta’kidlamoqda. Xususan, firma xodimlari taxminan 5 mingta turli parametrlarni o‘rganish asosida odamning psixologik portretini yaratadi. Siyosiy mayl, individuumning avvalgi saylovlarda qanday ovoz bergani, televizor orqali qanday ko‘rsatuvlar ko‘rishi, qayerdan qanday mahsulotlar sotib olishi kabi jihatlar hisobga olinadi.

So‘ng saylovchiga anonim psixologik testdan o‘tish taklif qilinadi, bunda uning ochiqligi, halolligi, qonunga rioya qilishi va asabbuzarliklarga moyilligi aniqlanadi. Bu esa potensial tarafdorga optimal darajada individual yondashuvni topishda yordam beradi.

CNN xabariga ko‘ra, avvalroq Cambridge Analytica Donald Trampning AQSh prezidentligiga saylovoldi poygadagi sobiq raqibi Ted Kruzga ishlagan. Texas shtatidan senator firmaga 5,8 million dollardan ziyod pul to‘lagan, shunga qaramay, u dastlabki saylovlar mavsumi natijalariga ko‘ra, milliarderdan ortda qoldi.