Isroil ommaviy axborot vositalarida O‘zbekistondagi ijtimoiy-siyosiy jarayonlar faol yoritib borilmoqda. Jumladan, REKA davlat radiokanali yangilik bloklaridan birini 4-dekabr kuni bo‘lib o‘tadigan O‘zbekiston Prezidenti sayloviga bag‘ishlandi. Bu haqda “Daryo”ga TIV matbuot xizmati ma’lum qildi.
Jurnalist Svi Zilberning 1-noyabr kuni efirga chiqqan “Xaritadagi nuqta” nomli mualliflik ko‘rsatuvida respublikada olib borilayotgan saylovga tayyorgarlik ishlari haqida so‘z yuritildi. Studiyaga taklif qilingan isroillik ekspertlar saylovning tashkil etilishi, Markaziy saylov komissiyasi vakolatlari, siyosiy partiyalarning davlat boshqaruvidagi o‘rni, parlamentarizmning rivojlanishi, fuqarolar huquqlarining himoya qilinishi borasida fikr bildirib o‘tdi.
Zeyev Xanin, siyosatshunos, Bar-Ilan universiteti o‘qituvchisi:
“O‘zbekiston — o‘zining geosiyosiy joylashuvi tufayli va insoniy resurslari, shuningdek, iqtisodiy salohiyati nuqtai nazaridan Markaziy Osiyodagi asosiy mamlakat. Respublika mustaqillikka erishganidan buyon mintaqaviy xavfsizlik tizimida o‘zak vazifasini bajarmoqda. Yuqorida sanab o‘tilgan omillarni inobatga olgan holda mamlakatdagi vaziyat xalqaro hamjamiyat e’tibori markazida desak, yanglishmaymiz.
Ta’kidlab o‘tish joizki, G‘arbning alohida siyosatshunoslarining respublikada vaziyat beqarorlashishi mumkinligi haqidagi prognozlari oqlanmadi. Mamlakatdagi vaziyat barqaror, buning teskarisini aytish uchun hech qanday sabab yo‘q.
Mustaqillik yillarida O‘zbekiston Respublikasida barqaror hokimiyat vertikali shakllantirildi, davlat tizimining asosi esa demokratiya prinsiplariga qurildi, konstitutsion islohot amalga oshirildi, parlamentarizm rivojlanishi jarayonlari ortga qaytmas bosqichga keldi”.
Sari Svi, “Isroil–O‘zbekiston” savdo palatasi raisi:
“O‘zbekistondagi saylov kampaniyasi faol bosqichga kirdi. Prezident saylovi muqobil asosda o‘tkazilmoqda, eng yuqori lavozimga mamlakatning barcha partiyalaridan to‘rt nomzod da’vogarlik qilmoqda.
Markaziy saylov komissiyasi, saylovlarni tayyorlash va o‘tkazishga mas’ul organ sifatida, xorij davlatlari va xalqaro tashkilotlardan ko‘plab kuzatuvchilarni taklif qildi. Bu saylov jarayonining shaffofligini ta’minlash ustuvor vazifa ekanligini ko‘rsatadi.
O‘zbekiston xalqi tinchlik va barqarorlikni tilaydi, bu uning barcha sohalardagi yutuqlarining asosiy kafolati hisoblanadi. O‘zbekiston yo‘nalish merosiyligini e’lon qildi, ya’ni mamlakat bundan keyin ham iqtisodiy islohotlar va demokratik o‘zgarishlar, huquqiy davlat va kuchli fuqarolik jamiyati qurish yo‘lidan boradi”.
Amnon Koen, Knessetning sobiq deputati:
“O‘zbekiston jamiyat va davlat qurish bosqichlaridan muvaffaqiyatli o‘tdi. Mamlakatda qonun ustuvorligini hamda hokimiyat tarmoqlari orasidagi muvozanatni ta’minlaydigan samarali model yaratilgan. Konstitutsion islohot tadrijiy kechib, uzluksiz xarakterga ega bo‘ldi. Mustaqil rivojlanish yillarida saylov tizimini takomillashtirish borasida ko‘zga ko‘rinarli o‘zgarishlar amalga oshirildi, bugun u eng yuqori xalqaro standartlar va demokratik prinsiplarga javob beradi.
2016-yil 4-dekabrga belgilangan Prezident saylovi natijalariga nafaqat respublikaning, balki butun Markaziy Osiyo mintaqasining keyingi rivoji bog‘liq”.
Izoh (0)