Iroqda 12 kishi mashinada portlab ketdi
4-noyabr, juma kuni Iroq shimolida yuz bergan portlashda 12 nafar tinch aholi, shu jumladan, ayollar va bolalar halok bo‘ldi, deb yozadi “Korrespondent.net”.
Politsiya polkovnigi Fatah Hasan bergan ma’lumotga ko‘ra, iroqliklar IShID terrorchilik guruhi nazorati ostidagi Havij shahridan qochib ketayotgan bo‘lgan.
Ular yo‘lda politsiya avtomobiliga chiqib olgan, u esa portlab ketgan. Halok bo‘lganlar orasida bir politsiyachi ham bor.
Politsiya versiyalaridan biriga ko‘ra, avtomobilga jangarilar oldindan mina o‘rnatib qo‘ygan. Shuningdek, portlovchi qurilma yo‘lovchilarning sumkalariga terrorchilar tomonidan solib qo‘yilgan bo‘lishi ham mumkin.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
