Yevropada xavfsizlik va hamkorlik tashkiloti (YXHT) Demokratik institutlar va inson huquqlari byurosi (DIIHB) muddatidan avval o‘tkazilayotgan O‘zbekiston Prezidenti saylovini kuzatish tadbirini boshladi. Bu haqda 2-noyabr kuni Toshkentda bo‘lib o‘tgan tadbirda ma’lum qilindi.
Elchi Peter Teyler rahbarlik qiladigan missiya Toshkent shahrida 15 nafar, mamlakat bo‘ylab 20 nafar uzoq muddatli kuzatuvchi-ekspertdan iborat bo‘ladi. Saylov kuni YXHTga a’zo 21 mamlakatdan 250 nafar qisqa muddatli kuzatuvchilarni jalb etish rejalashtirilgan.
Missiya O‘zbekistonda bo‘lajak saylovni YXHT majburiyatlariga, demokratik saylov o‘tkazishning xalqaro standartlari va majburiyatlariga hamda milliy qonunchilikka tayanib baholaydi.
Kuzatuvchilar saylov jarayonida bo‘lib o‘tadigan tadbirlarni, saylov ma’muriyati va mutasaddi tashkilotlar faoliyatini, qonunchilikka rioya qilish va saylovga tegishli ziddiyatlarning barham topishi jarayonini kuzatadi.
Kuzatuv davomida ekspertlar saylov tadbirlari ommaviy axborot vositalari tomonidan yoritilishini ham kuzatadi.
Bundan tashqari, missiya tegishli davlat tashkilotlari, siyosiy partiyalar, nomzodlar, fuqarolar jamiyati vakillari, ommaviy axborot vositalari va diplomatik tashkilotlar vakillari bilan uchrashadi.
Saylov kuni kuzatuvchilar saylov uchastkalarining ochilishi, ovoz berish jarayoni, byulletenlarni hisoblash va natijalarni taqdim etish tadbirlarini kuzatishni rejalashtirmoqda.
Missiyaning dastlabki xulosalari saylovdan bir kun keyin, yakuniy hisoboti esa ikki oydan so‘ng taqdim etiladi.
Saylov kuzatuvi bo‘yicha missiya hamda O‘zbekistondagi YXHT loyihalari muvofiqlashtiruvchisi ofisi o‘zining maxsus mandatlari bo‘yicha ish olib boradi.
Eslatib o‘tamiz, O‘zbekiston Prezidenti saylovi 2016-yil 4-dekabr kuni bo‘lib o‘tadi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)