O‘zbekiston Qizil yarim oy jamiyatida Ichki ishlar vazirligining favqulodda vaziyatlarda jabrlanganlarga birinchi tibbiy yordam ko‘rsatish bo‘yicha o‘quv kursini tamomlagan xodimlariga sertifikatlar topshirildi. Tadbir O‘zbekiston Respublikasi Ichki ishlar vazirligi va Xalqaro Qizil xoch qo‘mitasi tomonidan tashkil etildi. Bu haqda O‘zA xabar bermoqda.
O‘zbekiston Respublikasi Ichki ishlar vazirligining inson huquqlarini himoya qilish va yuridik ta’minlash boshqarmasi boshlig‘i o‘rinbosari O. Jo‘raboyevga ko‘ra, ichki ishlar idoralarining har bir xodimi, qaysi bo‘limda xizmat qilayotgani va oldiga qo‘yilgan vazifalardan qat’i nazar, aholi va o‘z xizmatdoshlariga birinchi tibbiy yordam ko‘rsatishni bilishi lozim.
Har yili vazirlik xodimlari uchun favqulodda vaziyatlarda jabrlanganlarga birinchi tibbiy yordam ko‘rsatish bo‘yicha o‘quv kurslari tashkil etilmoqda. Joriy yilda ushbu kurslarni 50 nafar xodim tamomladi.
Tadbirda bitiruvchilarga faoliyati davomida kerak bo‘ladigan maxsus adabiyot va boshqa vositalar topshirildi.
Izoh (0)