Kerri Lozanna qahvaxonasidagi kechki ovqatdan so‘ng orqa eshik orqali jurnalistlardan “qochib ketdi”

AQSh davlat kotibi Jon Kerri Shveysariyaning Lozanna shahrida “Bo-Rivaj” mehmonxonasi yaqinidagi qahvaxona oldida uni kutib turgan jurnalistlardan orqa eshik orqali “qochib ketdi”. Bu haqda “TASS” xabar berdi.

Kerri Suriya bo‘yicha ko‘p tomonlama uchrashuvdan so‘ng kechki ovqatga quymoq yeyish uchun qahvaxonaga kirgan edi.

Davlat departamenti rahbari qahvaxonada bir soatga yaqin vaqt o‘tkazib, so‘ng ketishni mo‘ljalladi. Qo‘riqchilar Kerriga savollar bilan “hujum qilish” uchun yig‘ilgan jurnalistlarni ko‘rib, uni orqa eshik orqali o‘tkazib yuborishga qaror qildi.

Jurnalistlar Kerrini to‘xtatib qolishga urindi, biroq qo‘riqchilar ularning yo‘lini to‘sib, bunga xalaqit berdi.