Ispaniya terma jamoasi va “Barselona” klubi himoyachisi Jerar Pike qo‘shiqchi Shakira bilan qanday tanishgani haqida hikoya qildi, deb yozdi “Chempionat”.
“JCh—2010 uchun Madridda suratga olinayotgan Waka Waka klipi jarayonida Shakirani ilk bor uchratdim. Keyinroq undan telefon raqamini so‘radim, — deb gap boshladi Pike. — U JARga Ispaniya terma jamoasidan oldinroq jo‘nab ketdi. Chunki uning ochilish marosimida ishlashi kerak edi”.
“Bir necha kundan keyin JARga biz ham yetib kelishimizni hisobga olib, undan mahalliy ob-havo haqida so‘rab, sms yozdim. Oddiy savol bu. Odatda unga qisqa javob beriladi. Lekin Shakira menga uzundan-uzoq javob yozdi. Temperatura kun davomida qanday o‘zgarishi ham e’tibordan chetda qolib ketmadi. Bu esa menga shunchaki emasdek tuyuldi”.
“Biz mundial davomida gaplashib turdik. Biroq turnir davomida u bilan ko‘risha olmadim. Musobaqa yakunida ko‘rishish yana nasib qildi. Avvalroq unga ko‘rishish uchun finalga qadar yetib borish lozim bo‘lsa, men bu ishni qilishim haqida aytgandim”, — deb so‘zladi Pike TV3 kanali uchun.
Ispaniya terma jamoasi Jahon Chempionati finalida Gollandiyani mag‘lub etib, bosh sovringa ega chiqdi. Pikega esa Shakira nasib qildi. Ayni vaqtda bu juftlikning ikki o‘g‘il farzandi bor.
Izoh (0)