O‘zbekistonlik yozuvchi “Russkiy Buker” nufuzli mukofoti short-listiga kirdi

Suhbat Aflotuniy taxallusi ostida ijod qiluvchi toshkentlik yozuvchi Yevgeniy Abdullayev “Russkiy Buker-2016” mukofotiga da’vogarlar short-listiga kirdi, deya xabar bermoqda mukofot rasmiy sayti.

Finalchilar oltiligi 5-oktabr kuni e’lon qilindi. Tanlov short-listi kirgan kitoblar orasida Suhbat Aflotuniyning “Jodugarlar sajdasi” (“Pokloneniye volxvov”) romani bor.

Ushbu olti kitob da’vogarlarning uzun ro‘yxatiga kirgan 24 ta asar orasidan saralab olindi. Tanlov g‘olibi 1,5 million rubl hajmidagi pul mukofotini qo‘lga kiritadi, finalchilarga esa 150 ming rubldan mukofot puli beriladi.

Aflotuniy bunday nufuzli mukofotlarga birinchi marta da’vogarlik qilayotgani yo‘q. U “Oktabr” jurnali (2004, 2006), “Rus mukofoti” (2005), “Triumf” (2006) mukofotlari sovrindoridir.