Fransiya hukumati Parij da’vogarlik qilayotgan 2024-yilgi yozgi Olimpiada uchun 1 milliard yevro ajratishga tayyor. Bu haqda Parij shahrining Olimpiada–2024 mezbonligiga da’vogarlik qilishiga bag‘ishlangan matbuot anjumanida mamlakat bosh vaziri Manuel Vals ma’lum qildi, deb xabar bermoqda “TASS”.
“Davlat zarur budjetning uchdan ikki qismini – 1 milliard yevro ajratadi. Mablag‘ xalq uchun foydali bo‘lgan obyektlar qurilishiga sarflanadi”, – dedi Manuel Vals.
Valsning so‘zlariga ko‘ra, hukumat ushbu summani 2018-yildan 2024-yilgacha ajratadi. Mablag‘ni qabul qilib oluvchi esa Parij bilan shimolda chegaradosh bo‘lgan Sena-Sen-Deni departamenti bo‘ladi. Aynan uning hududida olimpiya obyektlarini qurish rejalashtirilgan.
Ma’lumot uchun, Fransiya poytaxti Parij shahrida 1894-yili Xalqaro olimpiya qo‘mitasi tashkil etilgandi. Parij 1900 va 1924-yillarda yozgi Olimpiada mezboni bo‘lgan. Bundan tashqari, Fransiya uchta qishki Olimpiadaga ham mezbonlik qilgan: Shamoni (1924), Grenobl (1968) va Albervil (1992).
Parij bilan bir qatorda 2024-yilgi yozgi Olimpiadaga Budapesht (Vengriya), Los-Anjeles (AQSh) va Rim (Italiya) da’vogarlik qiladi. Olimpiada–2024 mezboni 2017-yilning sentabr oyida, Peru poytaxti Limada aniqlanadi.
Izoh (0)