Xitoy 2024-yilga kelib, ishlaydigan orbital kosmik stansiyasiga ega yagona mamlakatga aylanib qolishi mumkin. Bu haqda Xitoy aerokosmik ilmiy-texnika korporatsiyasi raisi Ley Fanpey ma’lum qildi, deb yozadi “TASS”.
“Xitoy o‘z kosmik stansiyasining eksperimental tayanch modulini taxminan 2018-yilda ‘Chanchjen-5’ og‘ir eltuvchi raketasi yordamida uchirmoqchi, bir nechta qismdan iborat 20 tonnali kosmik stansiya esa taxminan 2022-yilda uchiriladi”, — dedi Ley.
“Xalqaro kosmik stansiya 2024-yilda o‘z ishini to‘xtatgan vaqtda Xitoy kosmik stansiyasi ishini davom ettiradigan yagona stansiyaga aylanishi mumkin”, — deya qo‘shib qo‘ydi u.
Korporatsiya rahbari so‘zlariga ko‘ra, Xitoy stansiyasi tayanch modul va ikkita laboratoriya modullaridan iborat bo‘ladi, ular tutashuvchi portlar bilan jihozlangan bo‘lib, bu stansiyaga bir nechta kosmik kema kelib to‘xtashiga imkon beradi.
Shundan so‘ng uchuvchili kemalar va yuk kemalari stansiyaga va ortga — yerga parvozlar uyushtirib, uni foydali yuklar bilan ta’minlaydi. Kosmonavtlar stansiya bortida bir yildan oshiqroq qolishi mumkin.
Orbital stansiyaning xizmat muddati 10 yilga mo‘ljallanadi, u Yerdan 400 kilometrgacha masofada joylashadi.
Izoh (0)