Qodirov unga ko‘p marta suiqasd qilishga urinishganini aytdi

Checheniston rahbari Ramzan Qodirov respublikaga rahbarlik qilgan yillari davomida unga ko‘p bora suiqasd uyushtirishganini aytdi va bunday urinishlar kelajakda ham amalga oshirilishiga ishonch bildirdi, deb yozadi “TASS”.

“Ushbu yillar davomida ko‘p bora suiqasd qilishdi, bundan keyin ham shunday bo‘ladi, bunga ishonchim komil, chunki meni Checheniston Respublikasi konstitutsiyasi kafili va Rossiya vatanparvari sifatida … (ba’zilar) yoqtirmaydi. Lekin men osonlikcha taslim bo‘lmayman, biz o‘z respublikamiz va davlatimizni himoya qilamiz”, — dedi Qodirov jurnalistlarning savollariga javob berar ekan.

Shu bilan birga, u OAVda 2016-yil bahorida unga nisbatan suiqasd tayyorlangani haqida paydo bo‘lgan xabarlarni rad etdi va ularni “pista sotadigan kampirlarning gapi” deb atadi.

“Novaya gazeta” nashri Chechenistonning Nojay-Yurt tumanidagi Benoy qishlog‘ida, Ramzan Qodirov qarorgohida unga nisbatan suiqasd tayyorlangani, bu yerdan portlovchi qurilma, fitna ishtirokchilaridan esa ko‘plab qurol-aslaha musodara etilgani, bir necha o‘nlab kishilar qo‘lga olinganini bildirgandi.