Tailandda yo‘lovchi avtobusi ishtirokidagi YTHda 50 dan ortiq odam jabrlandi
Tailandning sharqiy qismida joylashgan Sakeu provinsiyasida 5-oktabr, chorshanba kuni yuz bergan yo‘l-transport hodisasi oqibatida bir kishi halok bo‘ldi, 50 dan ortiq odam jarohat oldi. Bu haqda mahalliy politsiya ma’lum qildi, deb yozadi “TASS”.
Huquqni muhofaza qilish organlarining ma’lum qilishicha, avariya kuchli jala vaqtida yuz bergan. Haydovchi avtobusni juda tez haydab, so‘ngra burilish oldidan tormoz bera boshlagan. Oqibatda transport vositasi surilib ketib, yo‘l to‘sig‘iga borib urilgan va ag‘darilib ketgan.
“Haydovchiga yo‘l-transport hodisasini keltirib chiqargan xavfli boshqaruv bo‘yicha ayblov e’lon qilindi”, — deyiladi politsiya xabarida.
Avtobus yo‘lovchilarni Rayong provinsiyasidan Mukdaxanga olib borayotgan edi. Dastlabki ma’lumotlarga ko‘ra, jabrlanganlarning barchasi Tailand fuqarolaridir.
