Tailandda barcha homilador ayollar Zika virusi mavjudligi yuzasidan tekshiriladi
Tailandning Zika virusi qayd etilgan hududlarida yashovchi barcha homilador ayollar shifokorlar tomonidan ushbu kasallik mavjudligi bo‘yicha tekshiruvdan o‘tkaziladi. Bu haqda mamlakat Sog‘liqni saqlash vazirligi ma’lum qildi, deb yozadi “TASS”.
“Vazirlikda onalar va bolalarga g‘amxo‘rlik qilish uchun zarur ma’lumot bo‘ladi”, — dedi sog‘liqni saqlash vaziri Pyasakon Sakonsatayadorn. Uning so‘zlariga qaraganda, tekshirish Tailandning 77 provinsiyasidan 16 tasi hududida o‘tkaziladi.
O‘tgan hafta shifokorlar Tailandda dunyoga kelgan chaqaloqlarda aniqlangan ikki mikrotsefaliya holati Zika virusi tufayli yuzaga kelganligini tasdiqlagandan so‘ng ommaviy tekshirish o‘tkazish haqidagi qaror qabul qilindi.
Tailandda xavfli virusni yuqtirib olganlarning jami soni joriy yilda allaqachon 349 kishiga yetdi, ulardan 25 nafarini homilador ayollar tashkil etadi.
