Alp tog‘larida rossiyalik parashyutchi halok bo‘ldi
Fransiyaning Alp tog‘laridagi Shamoni shahrida vingsyut (qanotli libos)da parvozni amalga oshirayotgan rossiyalik parashyutchi yerga qulab, halok bo‘ldi. Bu haqda Midi Libre’ga tayanib, “RBK” xabar bermoqda.
Xabarda qayd etilishicha, voqea 3-oktabr kuni sodir bo‘ldi. Ismi va yoshi ma’lum qilinmagan rossiyalik erkakning parashyuti ochilmagani ta’kidlanmoqda. Yerga qulash oldidan parashyutchi Elbonne ko‘chasidagi binolardan biriga urilgan.
Voqea yuzasidan surishtiruv ishlari olib borilmoqda.
“RBK”ning parashyut sohasidagi manbasi halok bo‘lgan erkak yekaterinburglik vingsyut-uchuvchi Ratmir Nagimyanov ekanini ma’lum qildi.
Parashyut sohasiga ixtisoslashgan Blinc jurnalining ma’lumotlariga ko‘ra, 2016-yilda dunyo bo‘ylab vingsyutda sakrab, halok bo‘lganlar soni 35 kishiga yetdi.
