“Real”ning Yevropa Chempionlar Ligasi 3-turidagi o‘yiniga birorta ham muxlis kiritilmasligi mumkin

Madridning “Real” klubi Yevropa Chempionlar Ligasi guruh bosqichi 3-turini Polshada “Legiya” klubiga qarshi o‘tkazadi. UEFA mazkur bellashuvni muxlislarsiz o‘tkazish qarorini chiqardi.

“Legiya”ning Dortmund “Borussiya”siga qarshi o‘yinida mahalliy muxlislar bir qator tartibsizliklar keltirib chiqargan. Maydonga pirotexnika vositalari va turli buyumlar uloqtirilgan. Buning oqibatida UEFA jamoaning uy uchrashuvi tomoshabinlarsiz o‘tishini ma’lum qilgan, deb yozdi “Championat.asia” “Legiya” saytiga tayanib.

Bundan tashqari “Legiya” 80 ming yevro miqdorida jarima to‘lab berishi ham kerak. Mazkur holat yuzasidan klub rasmiylari apellyatsiya berishga tayyorgarlik ko‘rmoqda.

Ma’lumot uchun, “Real”ning “Legiya” qarshi safar o‘yini 2-noyabr kuni bo‘lib o‘tadi.